✍ឧបនាយករដ្ឋមន្ត្រី វង្សី វិស្សុត ផ្តល់ការតម្រង់ទិសដល់មន្រ្តីរាជការថ្មី ១៥រូប នៅក្រុមប្រឹក្សាអ្នកច្បាប់
ថ្ងៃព័ធិ៍ ទី២០ ខែវិច្ឆិកា ឆ្នាំ២០២៥✍ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមប្រឹក្សាអ្នកច្បាប់ បានអញ្ជើញជួបសំណេះសំណាល និងផ្តល់ការតម្រង់ទិសការងារដល់មន្រ្តីរាជការថ្មីចំនួន ១៥រូប ដែលទើបប្រឡងជាប់ក្របខ័ណ្ឌ និងចូលបំពេញការងារនៅក្នុងអគ្គលេខាធិការដ្ឋាននៃក្រុមប្រឹក្សាអ្នកច្បាប់ នៃទីស្តីការគណៈរដ្ឋមន្ត្រី។
ក្នុងឱកាសនោះ ឯកឧត្តម ឧបនាយករដ្ឋមន្ត្រីប្រចាំការ បានវាយតម្លៃខ្ពស់ចំពោះការខិតខំប្រឹងប្រែងរបស់មន្រ្តីរាជការថ្មីទាំង១៥រូប ដែលបានឈានដល់ជោគជ័យតាមរយៈការប្រឡងប្រជែងដ៏យុត្តិធម៌ និងបានជ្រើសរើសមកបម្រើការងារនៅក្នុងវិស័យច្បាប់សាធារណៈ។
✍ឯកឧត្តម បានលើកទឹកចិត្តឱ្យមន្រ្តីរាជការថ្មីៗ បន្តខិតខំអភិវឌ្ឍសមត្ថភាពវិជ្ជាជីវៈជាប់ជាអនិច្ចា កាន់តែរឹងមាំ ដោយប្រកាន់ខ្ជាប់នូវគុណតម្លៃស្នូល ក្រមសីលធម៌ និងអភិក្រមការងាររបស់ទីស្តីការគណៈរដ្ឋមន្ត្រី នាំឱ្យការបម្រើសាធារណៈកាន់តែមានប្រសិទ្ធភាព និងឆ្លើយតបតាមតម្រូវការអភិវឌ្ឍឯកសារច្បាប់ជាតិ។
✍រៀបរៀងដោយបណ្ឌិត មាស ច័ន្ទរិទ្ធ ក្រុមការងារគណបក្សប្រជាជនកម្ពុជា ចុះមូលដ្ឋានខេត្តកំពង់ធំ។
