ព្រឹកថ្ងៃសុក្រ ទី២៣ ខែមករា ឆ្នាំ២០២៦ រដ្ឋបាលខេត្តព្រៃវែង បានរៀបចំពិធីបិទសន្និបាតបូកសរុបលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦ របស់រដ្ឋបាលខេត្តព្រៃវែង។
ក្រោមអធិបតីភាពដ៏ខ្ពង់ខ្ពស់
ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង នៅសាលប្រជុំធំ “A” សាលាខេត្តព្រៃវែង។
ពិធីសន្និបាតនេះ មានគោលបំណងឆ្លុះបញ្ចាំងវឌ្ឍនភាពនៃការអនុវត្តភារកិច្ចការងារប្រចាំឆ្នាំ២០២៥ ពិនិត្យលើបញ្ហាប្រឈមនានា និងដាក់ចេញទិសដៅអនុវត្តបន្តសម្រាប់ឆ្នាំ២០២៦ ដើម្បីពង្រឹងប្រសិទ្ធភាព ប្រសិទ្ធផល និងភាពជឿទុកចិត្ត ក្នុងការផ្តល់សេវាសាធារណៈជូនប្រជាពលរដ្ឋ ព្រមទាំងធានាសុខសុវត្ថិភាពសង្គម ស្របតាមគោលនយោបាយភូមិឃុំ សង្កាត់មានសុវត្ថិភាព តាមមាគាដឹកនាំរបស់រាជរដ្ឋាភិបាល នីតិកាលទី៧ ដឹកនាំដោយ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។
ក្នុងឱកាសនោះដែរ ឯកឧត្តមអភិសន្តិបណ្ឌិត ស សុខា បានប្រគល់ម៉ូតូចំនួន ៤០គ្រឿង ជូនដល់អធិការនគរបាលក្រុង ស្រុក ចំនួន៥ រួមមាន ក្រុងព្រៃវែង ស្រុកស្វាយអន្ទរ ស្រុកកញ្ជ្រៀច ស្រុកកំចាយមារ និងស្រុកបាភ្នំ ដើម្បីជួយសម្រួលដល់ការបំពេញភារកិច្ចការងារនៅមូលដ្ឋាន។
ពិធីនេះ មានការអញ្ជើញចូលរួមពីថ្នាក់ដឹកនាំ ក្រុមការងាររាជរដ្ឋាភិបាលចុះមូលដ្ឋាន មន្ត្រីរាជការ កងកម្លាំងប្រដាប់អាវុធ អាជ្ញាធរគ្រប់លំដាប់ថ្នាក់ និងសមាជិក សមាជិកាសរុបចំនួន ៤៨១រូប។
