ព័ត៌មានសង្ខេបសន្តិភាពប៉ុស្តិ៍៖
អាជ្ញាធរអំពាវនាវឱ្យប្រជាពលរដ្ឋរាយការណ៍ពីផលប៉ះពាល់ដោយសារខ្យល់កន្ត្រាក់ ដើម្បីសង្គ្រោះបន្ទាន់ ខេត្តបន្ទាយមានជ័យ
ស្ថានភាពអាកាសធាតុក្នុងរយៈពេលប៉ុន្មានថ្ងៃបន្ទាប់ពីពិធីបុណ្យចូលឆ្នាំថ្មីប្រពៃណីជាតិ បានបង្កឱ្យមានភ្លៀងកក់ខែ និងខ្យល់កន្ត្រាក់នៅតាមបណ្តាខេត្តមួយចំនួន ដែលបណ្តាលឱ្យខូចខាតផ្ទះសម្បែងរបស់ប្រជាពលរដ្ឋ ជាពិសេសក្នុងស្រុកស្វាយចេក ខេត្តបន្ទាយមានជ័យ។
ក្នុងចំណោមតំបន់ដែលរងផលប៉ះពាល់ ទីតាំងស្នាក់នៅបណ្ដោះអាសន្នរបស់ប្រជាពលរដ្ឋភៀសសឹក ស្ថិតក្រោមការគ្រប់គ្រងរបស់សមាគមអតីតយុទ្ធជន និងនិវត្តជនកម្ពុជា ក៏បានទទួលរងការខូចខាតផងដែរ ខណៈដែលក្រុមការងារបច្ចេកទេសកំពុងដុតដៃដុតជើងពន្លឿនការសាងសង់ជម្រកអចិន្ត្រៃយ៍ឱ្យបានឆាប់រហ័ស។
ដើម្បីឆ្លើយតបចំពោះមុខគ្រោះធម្មជាតិនេះ អាជ្ញាធរមានសមត្ថកិច្ចបានដាក់ចេញនូវវិធានការដូចខាងក្រោម៖
ការអំពាវនាវ៖ ស្នើឱ្យបងប្អូនប្រជាពលរដ្ឋភៀសសឹកដែលជួបប្រទះការលំបាក ឬផ្ទះសម្បែងរងការខូចខាត សូមប្រញាប់ផ្តល់ព័ត៌មាន និងរាយការណ៍មកកាន់អាជ្ញាធរមូលដ្ឋាន ឬស្នាក់ការក្រុមការងារដែលនៅជិតបំផុត។
គោលបំណង៖ ដើម្បីឱ្យក្រុមការងារចុះពិនិត្យស្ថានភាពផ្ទាល់ និងផ្តល់អន្តរាគមន៍ដោះស្រាយបញ្ហា ក៏ដូចជាផ្តល់ជំនួយសង្គ្រោះជូនបងប្អូនប្រជាពលរដ្ឋបានទាន់ពេលវេលា។
អាជ្ញាធរ និងក្រុមការងារសាងសង់ កំពុងបន្តតាមដានយ៉ាងយកចិត្តទុកដាក់លើសុវត្ថិភាព និងសុខុមាលភាពរបស់បងប្អូនអតីតយុទ្ធជន និងគ្រួសារភៀសសឹកទាំងអស់នៅក្នុងតំបន់៕
