ព័ត៌មានសង្ខេបសន្តិភាពប៉ុស្តិ៍
ខេត្តកំពង់ធំបង្ហាញសក្តានុពលវិនិយោគក្នុងវេទិកាធុរកិច្ចកម្ពុជា-ជប៉ុន នៅទីក្រុងអូសាកាទីក្រុងអូសាកា៖ កាលពីថ្ងៃទី១២ ខែមិថុនា ឆ្នាំ២០២៦ នៅក្នុង «វេទិកាស្តីពីការវិនិយោគនៅកម្ពុជា» ដែលប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) ប្រកបដោយភាពជោគជ័យ។
នៅក្នុងឱកាសនោះ បទបង្ហាញស្តីពីសក្តានុពលនៃការវិនិយោគក្នុងខេត្តកំពង់ធំ ត្រូវបានធ្វើឡើងដើម្បីទាក់ទាញវិនិយោគិនជប៉ុន។ តាមរយៈបទបង្ហាញនេះ ខេត្តកំពង់ធំបានគូសបញ្ជាក់ពី៖
✍ ទីតាំងយុទ្ធសាស្ត្រ៖ ការតភ្ជាប់ហេដ្ឋារចនាសម្ព័ន្ធ និងលទ្ធភាពទទួលបានការដឹកជញ្ជូន។
✍ វិស័យអាទិភាព៖ សក្តានុពលក្នុងវិស័យកសិ-ឧស្សាហកម្ម ការកែច្នៃផលិតផលកសិកម្ម និងការអភិវឌ្ឍសេដ្ឋកិច្ចមូលដ្ឋាន។
✍ បរិយាកាសវិនិយោគ៖ ការត្រៀមខ្លួនរួចជាស្រេចក្នុងការសម្របសម្រួល និងផ្តល់កិច្ចសហការជូនដល់វិនិយោគិនជប៉ុន ដែលមានបំណងពង្រីកប្រតិបត្តិការធុរកិច្ចនៅកម្ពុជា។
វេទិកានេះគឺជាកាលានុវត្តភាពដ៏សំខាន់មួយ ដើម្បីពង្រឹងកិច្ចសហប្រតិបត្តិការសេដ្ឋកិច្ចរវាងកម្ពុជា និងជប៉ុន ក៏ដូចជាការជំរុញលំហូរវិនិយោគផ្ទាល់ពីបរទេស (FDI) មកកាន់ខេត្តកំពង់ធំ ក្នុងគោលដៅជំរុញកំណើនសេដ្ឋកិច្ចជាតិ និងការបង្កើតការងារជូនប្រជាពលរដ្ឋ។
