ព័ត៌មានសង្ខេបសន្តិភាពប៉ុស្តិ៍៖
រដ្ឋបាលស្រុកប្រាសាទសំបូរ រៀបចំសង្ក្រាន្តអបអរសាទរឆ្នាំថ្មី ប្រកបដោយភាពអធិកអធម។
កំពង់ធំ៖ នាឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ព.ស. ២៥៧០ (គ.ស. ២០២៦) រដ្ឋបាលស្រុកប្រាសាទសំបូរ បានរៀបចំពិធីបើកព្រឹត្តិការណ៍ (សង្ក្រាន្តប្រាសាទសំបូរ) ក្រោមអធិបតីភាពដ៏ខ្ពង់ខ្ពស់របស់ លោកបណ្ឌិត ឃីម សុខឃាង អភិបាលនៃគណៈអភិបាលស្រុកប្រាសាទសំបូរ។
ព្រឹត្តិការណ៍នេះត្រូវបានរៀបចំឡើងក្នុងគោលបំណង៖
ថែរក្សាវប្បធម៌៖ លើកកម្ពស់ទំនៀមទម្លាប់ប្រពៃណីជាតិ និងការលេងល្បែងប្រជាប្រិយខ្មែរគ្រប់ប្រភេទ។
បង្កភាពសប្បាយរីករាយ៖ បង្កលក្ខណៈងាយស្រួលជូនដល់បងប្អូនប្រជាពលរដ្ឋ កងកម្លាំងប្រដាប់អាវុធ និងមន្ត្រីរាជការ បានជួបជុំសប្បាយរីករាយក្នុងបរិយាកាសសុខសន្តិភាព។
ទាក់ទាញទេសចរណ៍៖ បង្ហាញពីសក្តានុពលវប្បធម៌ និងទេសចរណ៍ដ៏សម្បូរបែបនៅក្នុងទឹកដីស្រុកប្រាសាទសំបូរ ខេត្តកំពង់ធំ។
ក្នុងឱកាសនោះ លោកបណ្ឌិតអភិបាលស្រុក ក៏បានពាំនាំនូវបណ្ដាំផ្ញើសាកសួរសុខទុក្ខ និងពរជ័យសិរីសួស្ដីពីសំណាក់ថ្នាក់ដឹកនាំគ្រប់លំដាប់ថ្នាក់ ជូនចំពោះបងប្អូនប្រជាពលរដ្ឋទាំងអស់ សូមឲ្យទទួលបាននូវភាពសប្បាយរីករាយ និងសុវត្ថិភាពក្នុងការធ្វើដំណើរ ក៏ដូចជាការចូលរួមលេងកម្សាន្តក្នុងយុទ្ធនាការសង្ក្រាន្តឆ្នាំនេះផងដែរ៕
រៀបរៀងដោយ
ឯកឧត្តមបណ្ឌិត មាស ច័ន្ទរិទ្ធ ទីប្រឹក្សាសម្តេចអគ្គមហាសេនាបតីតេជោ ហ៊ុន សែន និងជាក្រុមការងារគណបក្ស ចុះមូលដ្ឋានស្រុកប្រាសាទសំបូរ និងខេត្តកំពង់ធំ។
