ព័ត៌មានសង្ខេបសន្តិភាពប៉ុស្តិ៍
ព្រឹទ្ធសភាជាតិ រៀបចំពិធីសូត្រមន្តចម្រើនព្រះបរិត្ត និងអបអរសាទរពិធីបុណ្យចូលឆ្នាំថ្មីប្រពៃណីជាតិ។
កាលពីរសៀលថ្ងៃពុធ ទី០៨ ខែមេសា ឆ្នាំ២០២៦ នៅវិមានសាមគ្គីភាព ឯកឧត្តម អ៊ុច បូររិទ្ធ ប្រធានស្តីទីព្រឹទ្ធសភានៃព្រះរាជាណាចក្រកម្ពុជា និងលោកជំទាវ ព្រមទាំងថ្នាក់ដឹកនាំ និងមន្ត្រីរាជការនៃអគ្គលេខាធិការដ្ឋានព្រឹទ្ធសភា បានរៀបចំពិធីសូត្រមន្តចម្រើនព្រះបរិត្ត ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី ដែលនឹងឈានចូលមកដល់ក្នុងពេលឆាប់ៗនេះ។
ក្នុងឱកាសដ៏មហានក្ខត្តឫក្សនេះ អង្គពិធីបានរៀបចំ៖
កិច្ចសាសនា៖ ការប្រគេនទ័យទានដល់ព្រះសង្ឃ ដើម្បីបួងសួងសុំសេចក្តីសុខ សេចក្តីចម្រើន និងពរជ័យពីទេវតាឆ្នាំថ្មី ព្រះនាម រាក្យសាទេវី ជូនដល់ថ្នាក់ដឹកនាំ និងមន្ត្រីរាជការ ព្រមទាំងបួងសួងឱ្យប្រទេសជាតិបន្តមានសុខសន្តិភាព និងការអភិវឌ្ឍ។
សិល្បៈវប្បធម៌៖ ការសម្តែងរបាំជូនពរ របាំត្រុដិ និងឆៃយ៉ាំ ដើម្បីជម្រះស៊យចង្រៃ និងនាំមកនូវសិរីសួស្តី។
សាមគ្គីភាព៖ ការពិសាអាហាររួមគ្នា និងការលេងល្បែងប្រជាប្រិយខ្មែរ ក្នុងបរិយាកាសស្និទ្ធស្នាល និងសប្បាយរីករាយបំផុត។
ពិធីនេះសបញ្ជាក់ឱ្យឃើញពីការយកចិត្តទុកដាក់ខ្ពស់របស់ថ្នាក់ដឹកនាំព្រឹទ្ធសភា ក្នុងការថែរក្សាទំនៀមទម្លាប់ប្រពៃណីជាតិ និងការរឹតចំណងសាមគ្គីភាពផ្ទៃក្នុងរវាងថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់៕
✍រៀបរៀងដោយ
ឯកឧត្តម បណ្ឌិត មាស ច័ន្ទរិទ្ធ
ទីប្រឹក្សាសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានសមាគមសប្បុរសធម៌។
