ចំពោះអនុសាសន៍ដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា៖
សេចក្តីសង្ខេបព័ត៌មានសន្តិភាពប៉ុស្តិ៍យុទ្ធសាស្ត្រ៖ ការពង្រឹងវិន័យសង្គម និងការបណ្តុះបណ្តាលយុវជន។
១.ខ្លឹមសារគោលនយោបាយ
សម្តេចធិបតី នាយករដ្ឋមន្ត្រី បានដាក់ចេញនូវទិសដៅយុទ្ធសាស្ត្រថ្មីមួយ ដោយឱ្យពិនិត្យលទ្ធភាពរៀបចំក្របខ័ណ្ឌច្បាប់ ដើម្បីផ្លាស់ប្តូរវិធានការចំពោះ «(ក្មេងទំនើង)» ពីការដាក់ពន្ធនាគារ មកជាការបញ្ជូនទៅតំបន់ព្រំដែនវិញ។ វិធានការនេះមានគោលបំណងផ្លាស់ប្តូរឥរិយាបថអវិជ្ជមាន ឱ្យក្លាយជាកម្លាំងគាំទ្រដល់កិច្ចការការពារជាតិ និងការអភិវឌ្ឍតាមព្រំដែន។
២.សារៈសំខាន់នៃយុទ្ធសាស្ត្រអប់រំ និងការកែប្រែ
ការប្តូរពីការដាក់ទណ្ឌកម្ម មកជាការអប់រំតាមរយៈពលកម្ម៖ ការបញ្ជូនទៅកាន់តំបន់ព្រំដែន មិនមែនជាការដាក់ទោសដោយការបង្ខាំងនោះទេ ប៉ុន្តែជាការផ្តល់ឱកាសឱ្យយុវជនទាំងនោះរៀនសូត្រពីវិន័យកងទ័ព ការរស់នៅជាសមូហភាព និងការយល់ដឹងពីតម្លៃនៃសុខសន្តិភាព។
ការបណ្តុះស្មារតីស្នេហាជាតិ៖ តាមរយៈការជួយការងារកងទ័ព យុវជននឹងមានឱកាសស្វែងយល់ផ្ទាល់ពីការលះបង់របស់កងកម្លាំងប្រដាប់អាវុធ ដែលជាមូលដ្ឋានគ្រឹះក្នុងការបណ្តុះមនសិការឱ្យស្រឡាញ់ទឹកដី និងការពារបូរណភាពទឹកដី។
ការកសាងធនធានមនុស្សឡើងវិញ៖ បរិយាកាសនៅតាមព្រំដែន និងការហ្វឹកហ្វឺនវិន័យ នឹងជួយសម្រួចបុគ្គលិកលក្ខណៈរបស់ពួកគេឱ្យក្លាយជាពលរដ្ឋល្អ ដែលមានទំនួលខុសត្រូវចំពោះគ្រួសារ និងសង្គមជាតិ នៅពេលត្រឡប់មកវិញ។
៣.ផលប្រយោជន៍ដល់សង្គមជាតិ
ពង្រឹងសន្តិសុខសណ្តាប់ធ្នាប់សាធារណៈ៖ កាត់បន្ថយសកម្មភាពបង្កអសន្តិសុខក្នុងមូលដ្ឋាន និងការរំខានដល់ការរស់នៅរបស់ប្រជាពលរដ្ឋ។
គាំទ្រកម្លាំងការពារព្រំដែន៖ យុវជនអាចចូលរួមក្នុងសកម្មភាពការងារបង្កបង្កើនផល ការសាងសង់ហេដ្ឋារចនាសម្ព័ន្ធ និងកិច្ចការរដ្ឋបាលផ្សេងៗ ដើម្បីគាំទ្រដល់យុទ្ធសាស្ត្រ (បន្ទាយការពារជាតិរឹងមាំ)។
កាត់បន្ថយការចង្អៀតណែនក្នុងពន្ធនាគារ៖ ជាជម្រើសថ្មីក្នុងការដោះស្រាយបញ្ហាក្មេងទំនើងតាមរយៈយន្តការរដ្ឋបាល និងការអប់រំ បន្ថែមលើវិធានការច្បាប់ព្រហ្មទណ្ឌ។
✍រៀបរៀងដោយ
ឯកឧត្តម បណ្ឌិត មាស ច័ន្ទរិទ្ធ
ទីប្រឹក្សាសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា។
