សង្ខេបព័ត៌មានសន្តិភាពប៉ុស្តិ៍៖
កិច្ចប្រជុំអន្តរក្រសួងពិភាក្សាលើរបាយការណ៍តាមដានការអនុវត្តយុទ្ធសាស្ត្របញ្ចកោណ ដំណាក់កាលទី១ ឆ្នាំ២០២៥នាព្រឹកថ្ងៃទី៨ ខែឧសភា ឆ្នាំ២០២៦ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានគណៈកម្មាធិការតាមដាន ត្រួតពិនិត្យ និងវាយតម្លៃការអនុវត្តយុទ្ធសាស្ត្របញ្ចកោណ បានដឹកនាំកិច្ចប្រជុំអន្តរក្រសួង ដើម្បីពិនិត្យ និងពិភាក្សាលើការរៀបចំរបាយការណ៍តាមដានការអនុវត្តយុទ្ធសាស្ត្របញ្ចកោណ ដំណាក់កាលទី១ ឆ្នាំ២០២៥។
ខ្លឹមសារសំខាន់ៗនៃកិច្ចប្រជុំ៖
* គោលបំណង៖ កំណត់បន្ទាត់មូលដ្ឋាន (Baseline) និងចំណុចដៅ (Target) នៃសូចនាករសមិទ្ធកម្មគន្លឹះ (KPIs) ក្នុងវិស័យអាទិភាពចំនួន ៣ រួមមាន៖ វិស័យកសិកម្ម, សហគ្រាសធុនតូច និងមធ្យម (SMEs) និងបរិយាកាសធុរកិច្ច-ការប្រកួតប្រជែង។
*ការវាយតម្លៃវឌ្ឍនភាព៖ ឯកឧត្តមឧបនាយករដ្ឋមន្ត្រីប្រចាំការ បានសង្កត់ធ្ងន់ថា របាយការណ៍នេះមិនត្រឹមតែបង្ហាញពីលទ្ធផលសម្រេចបានប៉ុណ្ណោះទេ ប៉ុន្តែត្រូវឆ្លុះបញ្ចាំងពីបញ្ហាប្រឈម និងចំណុចខ្វះខាត ដើម្បីតម្រង់ទិសគោលនយោបាយឱ្យចំគោលដៅ។
* បញ្ហាប្រឈមដែលត្រូវបានលើកឡើង៖
* ភាពយឺតយ៉ាវនៃសូចនាករមួយចំនួន និងកម្រិតនៃការសម្របសម្រួលអន្តរក្រសួង។
*បញ្ហាបច្ចេកទេសក្នុងការកំណត់និយមន័យសូចនាករ និងការប្រមូលទិន្នន័យឱ្យមានសង្គតិភាព។
*កង្វះខាតប្រព័ន្ធព័ត៌មានវិទ្យាសម្រាប់ផ្ទៀងផ្ទាត់ និងចែករំលែកទិន្នន័យរវាងស្ថាប័ន។
ទិសដៅបន្ត៖
អង្គប្រជុំបានឯកភាពឱ្យក្រសួង-ស្ថាប័នពាក់ព័ន្ធ បន្តពិនិត្យឡើងវិញលើ៖
1.យន្តការចុះបញ្ជីពាណិជ្ជកម្ម និងការកំណត់និយមន័យ "សហគ្រាសធុនតូច និងមធ្យម" ឱ្យបានច្បាស់លាស់។
2.ការកសាងប្រព័ន្ធទិន្នន័យឱ្យមានសុក្រឹតភាព និងទាន់ពេលវេលា។
3.ការពង្រឹងសមត្ថភាពស្ថាប័ន និងធនធានមនុស្ស ដើម្បីធានាប្រសិទ្ធភាពនៃការអនុវត្តកម្មវិធីនយោបាយរបស់រាជរដ្ឋាភិបាល។
កិច្ចប្រជុំនេះមានការអញ្ជើញចូលរួមពី
ឯកឧត្តមទេសរដ្ឋមន្ត្រី ឈៀង យ៉ាណារ៉ា, ឯកឧត្តមរដ្ឋមន្ត្រីក្រសួងកសិកម្ម ឌិត ទីណា, ឯកឧត្តមរដ្ឋមន្ត្រីក្រសួងផែនការ ប៊ិន ត្រឈៃ និងតំណាងក្រសួង-ស្ថាប័នពាក់ព័ន្ធជាច្រើនរូបទៀត។
✍រៀបរៀងអត្ថបទដោយ
សមាជិកក្រុមការងារគណបក្ស ចុះមូលដ្ឋានខេត្តកំពង់ធំ និងជាប្រធានសមាគមសប្បុរសធម៌
បណ្ឌិត មាស ច័ន្ទរិទ្ធ
