ព័ត៌មានសង្ខេបសន្តិភាពប៉ុស្តិ៍
សម្ដេចក្រឡាហោម ស ខេង អញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់អគារសាលប្រជុំគណបក្សឃុំព្រៃស្នៀត។
ខេត្តព្រៃវែង៖ នៅព្រឹកថ្ងៃទី២៨ ខែមិថុនា ឆ្នាំ២០២៦ សម្ដេចក្រឡាហោម ស ខេង អនុប្រធានគណបក្សប្រជាជនកម្ពុជា បានអញ្ជើញជាអធិបតីដ៏ខ្ពង់ខ្ពស់ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវអគារសាលប្រជុំថ្មីរបស់គណបក្សឃុំព្រៃស្នៀត ស្រុកពារាំង ខេត្តព្រៃវែង។
ពិធីនេះមានការចូលរួមពីសំណាក់ថ្នាក់ដឹកនាំគណបក្សមូលដ្ឋាន សមាជិក សមាជិកា និងប្រជាពលរដ្ឋយ៉ាងច្រើនកុះករ។ អគារសាលប្រជុំថ្មីនេះ ត្រូវបានសាងសង់ឡើងដើម្បីឆ្លើយតបទៅនឹងតម្រូវការចាំបាច់ក្នុងការបម្រើការងាររដ្ឋបាលគណបក្ស ពង្រឹងការងារទំនាក់ទំនងជាមួយប្រជាពលរដ្ឋ និងជាទីតាំងសម្រាប់ប្រជុំពិភាក្សាដោះស្រាយបញ្ហាផ្សេងៗក្នុងមូលដ្ឋានឱ្យកាន់តែមានប្រសិទ្ធភាព។
ក្នុងឱកាសនោះ សម្ដេចក្រឡាហោម ស ខេង បានកោតសរសើរដល់ក្រុមការងារ និងសប្បុរសជនទាំងអស់ ដែលបានចូលរួមចំណែកកសាងសមិទ្ធផលនេះឡើង។ សម្ដេចក៏បានគូសបញ្ជាក់ពីសារៈសំខាន់នៃការបន្តពង្រឹងសាមគ្គីភាពផ្ទៃក្នុង និងការប្តេជ្ញាចិត្តរបស់គណបក្សប្រជាជនកម្ពុជា ក្នុងការបម្រើប្រយោជន៍ជាតិ និងប្រជាជនដោយស្មោះត្រង់។
ការដាក់ឱ្យប្រើប្រាស់អគារសាលប្រជុំនេះ គឺជាសក្ខីភាពមួយទៀតនៃការពង្រីកហេដ្ឋារចនាសម្ព័ន្ធគណបក្សនៅថ្នាក់មូលដ្ឋាន ដើម្បីធានាបាននូវការបំពេញភារកិច្ចជូនប្រជាពលរដ្ឋបានយ៉ាងជិតស្និទ្ធ និងទាន់ពេលវេលា។
អត្ថបទផ្សព្វផ្សាយដោយ
ប្រធានសមាគមសប្បុរសធម៌
បណ្ឌិត មាស ច័ន្ទរិទ្ធ នឹងជាទីប្រឹក្សាសម្ដេចតេជោ ហ៊ុន សែន
ប្រធានគណបក្សប្រជាជនកម្ពុជា។
