អាជ្ញាធរ និងអ្នកសារព័ត៌មាន មិនត្រូវចាត់ទុកគ្នាជាសត្រូវឡើយ តែត្រូវសហការគ្នាដោយស្មារតីវិជ្ជាជីវៈ និងការទទួលខុសត្រូវ
នៅថ្ងៃទី២៤ ខែតុលា ឆ្នាំ២០២៦ ឯកឧត្តម នេត្រ ភក្ត្រា មន្ត្រីក្រសួងព័ត៌មាន បានមានប្រសាសន៍ថា៖ «អាជ្ញាធរមិនត្រូវយកអ្នកសារព័ត៌មានជាសត្រូវនោះឡើយ ហើយអ្នកសារព័ត៌មានក៏មិនត្រូវយកអាជ្ញាធរធ្វើជាសត្រូវដូចគ្នាដែរ»។
ប្រសាសន៍នេះត្រូវបានលើកឡើងក្នុងវគ្គសិក្ខាសាលាស្តីពី «ការទទួលខុសត្រូវវិជ្ជាជីវៈរបស់អ្នកសារព័ត៌មានក្នុងសម័យឌីជីថល» ដែលមានអ្នកចូលរួមប្រមាណ ៧០០ នាក់ រួមមានអ្នកសារព័ត៌មាន មន្ត្រីនគរបាល និងអាជ្ញាធរមូលដ្ឋាន មកពីខណ្ឌទាំង ១៤ នៃរាជធានីភ្នំពេញ។
សិក្ខាសាលានេះមានសារៈសំខាន់ក្នុងការលើកកម្ពស់ការយល់ដឹងអំពីការទទួលខុសត្រូវវិជ្ជាជីវៈ សីលធម៌សារព័ត៌មាន និងការពង្រឹងកិច្ចសហការរវាងអ្នកសារព័ត៌មាន និងអាជ្ញាធរ ដើម្បីធានាឱ្យការបំពេញភារកិច្ចរបស់ភាគីទាំងពីរប្រព្រឹត្តទៅដោយការគោរពគ្នាទៅវិញទៅមក ស្របតាមច្បាប់ និងគោលការណ៍វិជ្ជាជីវៈ។
ជារួម អាជ្ញាធរ និងអ្នកសារព័ត៌មាន គួរមានការយោគយល់គ្នា គោរពតួនាទី និងភារកិច្ចរៀងៗខ្លួន ព្រមទាំងបង្កើនកិច្ចសហការប្រកបដោយតម្លាភាព និងការទទួលខុសត្រូវ ដើម្បីរួមចំណែកលើកកម្ពស់សិទ្ធិទទួលបានព័ត៌មាន និងបម្រើផលប្រយោជន៍សាធារណៈ។
#ក្រសួងព័ត៌មាន #អ្នកសារព័ត៌មាន #វិជ្ជាជីវៈសារព័ត៌មាន #ការទទួលខុសត្រូវក្នុងសម័យឌីជីថល
