✍IIII.ដំណាក់កាលធំៗទាំងបីនៃសភាពការណ៍កម្ពុជា (១៩៧៩-បច្ចុប្បន្ន)
ការវិវត្តនៃសភាពការណ៍កម្ពុជា អាចបែងចែកជា ៣ ដំណាក់កាលគន្លឹះ៖ដំណាក់កាលទី១ (១៩៧៩-១៩៩៣): ការស្តារឡើងវិញ និងការស្វែងរកសន្តិភាព។
✍ជាដំណាក់កាលនៃការរស់ឡើងវិញបន្ទាប់ពីរបបប្រល័យពូជសាសន៍។ កម្ពុជាបានផ្តោតលើការទប់ស្កាត់ការវិលត្រឡប់នៃរបបខ្មែរក្រហម ការកសាងរចនាសម្ព័ន្ធរដ្ឋបាល និងការឈានទៅរកកិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១ និងការបោះឆ្នោតជាតិឆ្នាំ ១៩៩៣។
✍ដំណាក់កាលទី២ (១៩៩៣-១៩៩៨): ការបង្រួបបង្រួមជាតិ និងនយោបាយឈ្នះ-ឈ្នះ បន្ទាប់ពីការបង្កើតរាជរដ្ឋាភិបាលចម្រុះ កម្ពុជានៅតែបន្តមានតំបន់អបគមន៍ខ្មែរក្រហម។ តាមរយៈ "នយោបាយឈ្នះ-ឈ្នះ" របស់សម្តេចតេជោ កម្ពុជាបានសម្រេចនូវសន្តិភាពពេញលេញ និងឯកភាពជាតិទាំងស្រុងនៅចុងឆ្នាំ ១៩៩៨ ដែលជាមូលដ្ឋានគ្រឹះនៃការអភិវឌ្ឍ។
✍ដំណាក់កាលទី៣ (១៩៩៩-បច្ចុប្បន្ន): ការអភិវឌ្ឍ និងសមាហរណកម្មអន្តរជាតិ កម្ពុជាបានក្លាយជាសមាជិកអាស៊ាន (១៩៩៩) និងអង្គការពាណិជ្ជកម្មពិភពលោក (២០០៤)។ សេដ្ឋកិច្ចមានកំណើនខ្ពស់ជាប់គ្នាជាច្រើនទសវត្សរ៍ ឈានពីប្រទេសមានចំណូលទាប ទៅជាប្រទេសមានចំណូលមធ្យមកម្រិតទាប និងកំពុងឆ្ពោះទៅរកគោលដៅឆ្នាំ ២០៣០ និង ២០៥០។
✍ទិសដៅភារកិច្ចរយៈពេលបន្ត
ដើម្បីបន្តនិរន្តរភាពជាតិ និងការរីកចម្រើន រាជរដ្ឋាភិបាលបានកំណត់ភារកិច្ចចំពោះមុខសំខាន់ៗ៖
ការរក្សាសន្តិភាព និងស្ថិរភាពនយោបាយ៖ ការពាររាល់សមិទ្ធផលជាតិ ទប់ស្កាត់ការជ្រៀតជ្រែកពីខាងក្រៅ និងធានាសណ្តាប់ធ្នាប់សង្គមឱ្យបានរឹងមាំ។
ការអនុវត្តយុទ្ធសាស្ត្របញ្ចកោណ៖ ផ្តោតលើការកែទម្រង់រដ្ឋបាលសាធារណៈ ការអភិវឌ្ឍធនធានមនុស្ស ការជំរុញឌីជីថលភាវូបនីយកម្ម និងការកសាងសេដ្ឋកិច្ចធន់។
ការលើកកម្ពស់កម្រិតជីវភាពប្រជាជន៖ បន្តកាត់បន្ថយភាពក្រីក្រ ពង្រឹងប្រព័ន្ធគាំពារសង្គម និងការផ្តល់សេវាសាធារណៈ (សុខាភិបាល អប់រំ) ឱ្យកាន់តែប្រសើរ និងមានយុត្តិធម៌។
សមាហរណកម្ម និងកិត្យានុភាពអន្តរជាតិ បន្តដើរតួនាទីយ៉ាងសកម្មក្នុងឆាកអន្តរជាតិ ពង្រឹងកិច្ចសហប្រតិបត្តិការសេដ្ឋកិច្ច និងការទូតពហុភាគី។
✍ឯកឧត្តមបណ្ឌិត មាស ច័ន្ទរិទ្ធ
ទីប្រឹក្សាសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានសមាគមសប្បុរសធម៌។
