ព័ត៌មានអប់រំសង្ខេបសន្តិភាពប៉ុស្តិ៍៖ រួមគ្នាបង្ការវិបត្តិផ្លូវចិត្ត និងបញ្ចៀសឱ្យឆ្ងាយពីគ្រឿងញៀន។
ករណីអត្តឃាតមិនសម្រេចដែលបានកើតឡើងនៅក្រុងដូនកែវ ខេត្តតាកែវ កាលពីយប់មិញនេះ គឺជាសញ្ញាអាសន្នមួយរំលឹកយើងគ្រប់គ្នាឱ្យបង្កើនការយកចិត្តទុកដាក់លើបញ្ហាសុខភាពផ្លូវចិត្ត និងផលប៉ះពាល់ដ៏បំផ្លិចបំផ្លាញនៃគ្រឿងញៀននៅក្នុងសង្គម។ដើម្បីចូលរួមទប់ស្កាត់ និងអប់រំណែនាំសហគមន៍ យើងត្រូវយល់ដឹងពីចំណុចគន្លឹះសំខាន់ៗដូចខាងក្រោម៖។
១.ផលវិបាកដ៏ធ្ងន់ធ្ងរនៃគ្រឿងញៀន
✍ បំផ្លាញខួរក្បាល និងប្រព័ន្ធប្រសាទ៖ ការប្រើប្រាស់គ្រឿងញៀនធ្វើឱ្យបាត់បង់ម្ចាស់ការលើខ្លួនឯង វង្វេងវង្វាន់ បង្កើតឱ្យមានរោគចិត្ត គិតខ្លី និងឈានទៅដល់ការបញ្ចប់ជីវិតខ្លួនឯង ឬបង្កគ្រោះថ្នាក់ដល់អ្នកដទៃ។
✍ បំផ្លាញអនាគត និងគ្រួសារ៖ គ្រឿងញៀនមិនត្រឹមតែបំផ្លាញសុខភាពបុគ្គលម្នាក់នោះទេ ប៉ុន្តែវាបានដុតបំផ្លាញទ្រព្យសម្បត្តិ សេចក្ដីសុខ និងសុភមង្គលរបស់ក្រុមគ្រួសារទាំងមូលផងដែរ។
២.សារៈសំខាន់នៃការថែទាំសុខភាពផ្លូវចិត្ត
✍ កុំទុកឱ្យអ្នកមានវិបត្តិផ្លូវចិត្តនៅម្នាក់ឯង៖ ជម្ងឺបាក់ទឹកចិត្ត និងសម្ពាធផ្លូវចិត្តធ្ងន់ធ្ងរ ត្រូវការការយល់ចិត្ត ការលួងលោម និងការជួយសង្គ្រោះផ្នែកវេជ្ជសាស្ត្រជាបន្ទាន់ មិនមែនការរើសអើងឡើយ។
✍ ស្វែងរកជំនួយ៖ ប្រសិនបើដឹងថាខ្លួនឯង ឬសមាជិកគ្រួសារមានបញ្ហាផ្លូវចិត្ត ឬរងឥទ្ធិពលពីសារធាតុញៀន ត្រូវប្រញាប់ស្វែងរកសេវាប្រឹក្សាយោបល់ ឬបញ្ជូនទៅមន្ទីរពេទ្យជំនាញដើម្បីព្យាបាល។
✍រៀបរៀងអត្ថបទដោយ
ប្រធានសមាគមសប្បុរសធម៌
បណ្ឌិត មាស ច័ន្ទរិទ្ធ។
